เอโก สูโร เอโก วิจกฺขโณ สพฺเพ เจเต อภิภวิย ราชาเยว เตสํ อุตฺตโม โหติ เอวเมว
โข มหาราช ภควา สพฺพสตฺตานํ อคฺโค เชฏฺโฐ เสฏฺโฐ ฯ ยมฺปน อาวสฺมา พากุโล
อปฺปาพาโธ อโหสิ ตํ อภินีหารวเสน ฯ โส หิ มหาราช อโนมทสฺสิสฺส ภควโต
อุทรวาตาพาเธ อุปฺปนฺเน วิปสฺสิสฺส จ ภควโต อฏฺฐวีสติยา จ ภิกฺขุสตสหสฺสานํ
คิลานปุพฺพกโรเค อุปฺปนฺเน สยํ ตาปโส สมาโน นานาเภสชฺเชหิ ตํ พยาธึ อปเนตฺวา
อปฺปาพาธตฺตํ ปตฺโต ภณิโต จ เอตทคฺคํ ภิกฺขเว มม สาวกานํ ภิกฺขูนํ อปฺปาพาธานํ
ยทิทํ พากุโลติ ฯ ภควโต มหาราช พฺยาธิมฺหิ อุปฺปชฺชนฺเตปิ อนุปฺปชฺชนฺเตปิ ธุตงฺคํ
อาทิยนฺเตปิ อนาทิยนฺเตปิ นตฺถิ ภควตา สทิโส โกจิ สตฺโต ฯ ภาสิตมฺเปตํ มหาราช
ภควตา เทวาตเทเวน สํยุตฺตนิกาเย วรลญฺจเก ยาวตา ภิกฺขเว สตฺตา อปทา วา ทฺวิปฺปทา
วา จตุปฺปทา วา พหุปฺปทา วา รูปิโน วา อรูปิโน วา สญฺญิโน วา อสญฺญิโน
วา เนวสญฺญีนาสญฺญิโน วา ตถาคโต เตสํ อคฺคมกฺขายติ อรหํ สมฺมาสมฺพุทฺโธติ ฯ
สาธุ ภนฺเต นาคเสน เอวเมตํ ตถา สมฺปฏิจฺฉามีติ ฯ

ภควโต อปฺปาพาธปญฺโห นวโม ฯ

ภนฺเต นาคเสน ภาสิตมฺเปตํ ภควตา ตถาคโต ภิกฺขเว อรหํ สมฺมาสมฺพุทฺโธ
อนุปฺปนฺนสฺส มคสฺส อุปฺปาเทตาติ ฯ ปุน จ ภณิตํ อทฺทสา โขหํ ภิกฺขเว โปราณํ
มคฺคํ โปราณํ อญฺชสํ ปุพฺพเกหิ สมฺมาสมฺพุทฺเธหิ อนุยาตนฺติ ฯ ยทิ ภนฺเต นาคเสน
ตถาคโต อนุปฺปนสฺส มคฺคสฺส อุปฺปาเทตา เตนหิ อทฺทสา โขหํ ภิกฺขเว โปราณํ มคฺคํ
โปราณํ อญฺชสํ ปุพฺพเกหิ สมฺมาสมฺพุทฺเธหิ อนุยาตนฺติ ยํ วจนํ ตํ มิจฺฉา ฯ ยทิ
ตถาคเตน ภณิตํ อทฺทสา โขหํ ภิกฺขเว โปราณํ มคฺคํ โปราณํ อญฺชสํ ปุพฺพเกหิ
สมฺมาสมฺพุทฺเธหิ อนุยาตนฺติ เตนหิ ตถาคโต ภิกฺขเว อรหํ สมฺมาสมฺพุทฺโธ อนุปฺปนฺนสฺส
มคฺคสฺส อุปฺปาเทตาติ ตมฺปิ วจนํ มิจฺฉา ฯ อยมฺปิ อุภโต โกฏิโก ปญฺโห ตวานุปฺปตฺโต
โส ตยา นิพฺพาหิตพฺโพติ ฯ
ภาสิตมฺปิ เจตํ มหาราช ภควตา ตถาคโต ภิกฺขเว อรหํ สมฺมาสมฺพุทฺโธ
อนุปฺปนฺนสฺส มคฺคสฺส อุปฺปาเทตาติ ฯ ภณิตญฺจ อทฺทสา โขหํ ภิกฺขเว โปราณํ
มคฺคํ โปราณํ อญฺชสํ ปุพฺพเกหิ สมฺมาสมฺพุทฺเธหิ อนุยาตนฺติ ฯ ตํ ทฺวายมฺปิ
สภาววจนเมว ฯ ปุพฺพกานํ มหาราช ตถาคตานํ อนฺตรธาเนน อสติ อนุสาสเก มคฺโค
อนฺตรธายิ โส ตํ ตถาคโต มคฺคํ ลุตฺตํ ปลุตฺตํ รูปฬฺหํ ปิหิตํ ปฏิจฺฉนฺนํ อสญฺจรณํ